“Hiriak x Natura” jardunaldia antolatu zuen CEAk Herrandarren kalea eraldatzeko proiektuari amaiera emateko

Vitoria-Gasteizek “Hiriak x Natura” jardunaldia egin zuen urriaren 28an, Ingurugiro Gaietarako Ikastegiak antolatuta. Topaketa horretan, azpiegitura berdearekin eta hiri plangintzarekin lotutako hainbat administrazio publikotako, unibertsitatetako, ikerketa zentrotako, enpresa eta erakundeetako teknikariak bildu ziren.

Hitzordua Gasteizko Udalak bultzatutako Herranden Kale Berria proiektuaren barruan kokatu zen (hiriko bide ardatz nagusietako bat korridore berde handi bihurtzeko helburua duen proiektua da). Obrak datozen asteetan amaituko dira, eta Arabako hiriburua duela hamarkada batzuetatik garatzen ari den hiri birnaturalizazioaren estrategiarekin lotuta daude.

Beatriz Artolazabal alkateorde eta Espazio Publikoaren eta Auzoen zinegotziak inauguratu zuen jardunaldia, eta azpimarratu zuenez, “proiektu honek naturak espazio publikoan betetzen duen zeregina birpentsatzera eta hiri osasungarriago eta erresilienteago baterantz aurrera egiten jarraitzera gonbidatzen gaitu. Herrandarren Kale Berriak Gasteiz hiribidearen eraldaketarekin hasitako bideari jarraitzen diola: asfalto gutxiago, natura gehiago, oinez ibiltzeko eta elkarrekin bizitzeko espazio gehiago. Ekimen honen bidez, hiri natura hiri politiken erdigunean jartzen dugu berriro, klima aldaketaren aurkako tresna gisa ez ezik, ongizatearen, osasunaren eta gizarte kohesioaren iturri gisa”.

Herrandarren kalean egindako eraldaketa aurkezteaz gain, udalak 2014an onartutako Hiri Azpiegitura Berdearen Estrategiari heldu zitzaion, eta azken urteotan bultzatutako hiri birnaturalizazioko hainbat proiektutara bisita teknikoak egin ziren, hala nola Kanpokale Berria, Aldabe, Memorialaren ingurua, Haurren Auzoa edo Martin Ttipia plaza.

Gonbidatutako hirien artean Bartzelona eta Bordele egon ziren, eta haietan egindako hiri egokitzapeneko eta naturalizazioko esperientzia propioak azaldu zituzten bertako teknikariek.