Gasteiz, hiriko baratze ekologikoez harro
Gasteiz hiriko baratze ekologikoez harro dagoela erakusteko bost bideo zabaldu ditu sare sozialetan eta Udalaren informazio-pantaila zein ikus-entzunezko euskarrietan. Ingurugiro Gaietarako Ikastegiak sustatu du ekimena, hiriko baratzezaintza ekologikoko proiektua ikusarazteko eta horretan parte hartzen dutenei eskerrak emateko.
CEAren bitartez, Gasteizko Udala baratzezaintza ekologikoa hirian eta hiri ingurunean (Eraztun Berdea) landu dadin sustatzen ari da, hiriko azpiegitura berdea osatu, elikagaien tokiko ekoizpena eta kontsumoa sustatu eta elikadura osasungarria zein aisialdi aktiboa bultzatzeko xedez.
“Herritarrek bertako elikagaien eta elikagai ekologikoen ekoizpenak eta kontsumoak duten garrantziaz kontzientzia har dezaten eta Gasteiz inguruan hori ahalbidetzen duten proiektuetan parte har dezaten lortu nahi du proiektuak. Zalantzarik gabe, horrelako ekimenek gure gizartean oinarrizko zenbait kontzeptu zabaltzen lagundu behar dute, besteak beste, elikadura-burujabetza, tokiko produktuen ekoizpena, elikadura osasungarria eta osasunerako hezkuntza”, nabarmendu du CEAko lehendakari Ana Oregik.
Une honetan, espazio publikoetan baratzezaintzarekin lotutako zenbait ekimen garatzen ari dira:
- Eraztun Berdeko udal baratzeak
- Gizarte etxeetako baratze ekologikoak
- Kudeaketa komunitarioko baratze ekologikoak
- Eskola-baratzeak
- Falerina lorategiko baratzea
- Hiri baratze ekologikoak
- Hiri baratzezaintzako proiektu autonomoak