Vitoria-Gasteizko txirrindularien istripuen eta portaeraren ikerlanak
Lehen ikerlana Udaltzaingoarekin lankidetzan egin du CEAk, eta haren funtsa 2008-2011 urteertan txirrindulariek izan dituzten istripuen argitze-agiriak aztertzea izan da. Txirrindularien istripuen laburpen estatistikoak landu dira adina, urteko hilabeteak, asteko egunak, eguneko orduak eta sexua irizpidetzat hartuz. Horrez gain, istripua gertatzeko unean bizikleta nondik zebilen analizatu da (ea galtzadatik, espaloitik ala bizikleta bidetik zioan), ezbeharren zergati nagusiak zeintzuk izan diren ere begiratu da, eta txirrindularien lesioen pronostikoa ikusi da. Azkenik, ezbeharrak hiriko zein tokietan gertatzen diren aztertu da eta istripuen kontzentrazio handiagoak dituzten puntuak mapetan markatu dira.
Txirrindularien portaera aztertu duen ikerlanean, bestalde, bizikleta erabiltzaileak hiriko 10 bidegurutzetan nola mugitzen diren ikusi da. Kale mota guztiak (bidegorria dutenak, ez dutenak, oinezkoentzakoak soilik, etab.) barne hartzen dituzten bidegurutzeak hautatu dira, eta bizikletak nondik dabiltzan (galtzadatik, espaloitik, bizikleta bideetatik) eta zirkulazio arauak zein neurritan errespetatzen dituzten ikertu da.
