Vitoria-Gasteizko Mugikortasun Iraunkorrerako eta Espazio Publikorako Planaren aurrerapena aurkeztu da

Vitoria-Gasteizko Mugikortasun Iraunkorrerako Planaren aurrerapena otsailaren 21ean aurkeztu zuten Vitoria-Gasteizko alkate Alfonso Alonsok, Ingurugiro Gaietarako Ikastegiko teknikari Mónica Ibarrondok eta Bartzelonako Hiri Ekologiaren Agentziako zuzendari Salvador Ruedak.

Azterketa hau Vitoria-Gasteizko Udaleko zerbitzu teknikoek eta Bartzelonako Hiri Ekologiaren Agentziako teknikariek egin dute elkarlanean, eta bere garapenerako, modu paraleloan gauzatzen ari den hiritarren parte-hartzerako prozesuan ekoiztu diren emaitzak kontuan hartu ditu.

Planaren helburuak honako hauek dira:

• Vitoria-Gasteizko mugikortasunaren eta espazio publikoen irisgarritasunaren egungo egoera diagnostikatzea
• Jokaleku desberdinak analizatzea, hiriaren etorkizuneko proiekzioa kontuan hartuz
• Vitoria-Gasteizko hiri mugikortasunerako eredu ahalik eta jasangarriena sortzea, espazio publikoaren erabilera, igorpenak atmosferara, zarata eta energia kontsumoa bezalako alderdiak kontuan hartuz
• Baliabide eta energia kontsumo txikiagoa eragingo duen mugikortasun sare berri baten konfigurazioa definitzea
• Adierazle sorta bat eskaintzea kudeatzaileei, hiriko espazio publikoaren kalitatea gehitzea ahalbidetuko duten erabakiak hartu ahal izateko

Planaren aurrerapenaren dokumentua Mugikortasun Iraunkorrerako Planaren webgunean ikusi daiteke:

http://www.vitoria-gasteiz.org/mugikortasuna

Agiri hau gizarte etxeetako liburutegietan ere kontsulta daiteke, hain zuzen, Abetxuku, Aldabe, Judimendi, Iparralde, Hegoalde, Lakua, El Pilar eta Arriagan.