Mugikortasun Iraunkorraren aldeko Hiritar Foroak aurrera darrai
Hainbat hilabete dira jada Vitoria-Gasteizek Mugikortasun Iraunkorrerako Planaren prestaketa abian jarri zuenetik. Plan honek honako helburu hauek ditu:
- Automobila gero eta gehiago erabiltzeko joera alderantzikatzea
- Automobila erabiltzen duen jendeak garraio publikoa eta bizikleta erabil dezan lortzea
- Mugitzeko premiak murriztea
- Oinezkoentzako eta bizikletentzako sare funtzionalak sortzea
- Zirkulazioa espazio publikotik ateratzea, hiriko jendearentzat kalitatezko ingurunea berreskuratzeko
Mugikortasun Plan batek herritarren artean duen garrantzia ikusirik, funtsezkoa da Planak kontuan har ditzan hiriko gizarte eragileek hasierako faseetatik bertatik egin ditzaketen ekarpenak. Hori dela eta, ekainean Mugikortasun Iraunkorraren aldeko Hiritar Foro bat eratu zen, Planaren gidalerro nagusiak definituko dituen Mugikortasunaren Hiritar Ituna kontsentsu bidez erdiesteko.
Foroa ekainaren 11n aurkeztu zen, eta urriaren 4an berriro bildu zen. Ekitaldi hartan mugikortasun iraunkorraren kontzeptua azaldu eta kokatu zen, Mugikortasun Plana zein egoeratan zegoen jakinarazi zen, Mugikortasun Iraunkorraren aldeko Hiritar Ituna definitu zen eta mugikortasunari buruz prestatu den txosten sektoriala aurkeztu zen (txosten hau "GEO Vitoria-Gasteiz" deituriko iraunkortasun eta ingurumen egoeraren txosten diagnostioaren atal bat da). Bukatzeko, solasaldi bat egon zen.
Hiritar Foroaren hurrengo hitzordua azaroaren 21 eta 29an izango da, Montehermoso Kulturunean, 19:00etan. Ekitaldi berri honetan 2020. urteko Vitoria-Gasteizek zein hiri mugikortasun eduki beharko lukeen definituko da eta egoera berri hau erdiesteko zein helburu eta gidalerro finkatu behar diren eztabaidatuko da. Eztabaidaren emaitzak Mugikortasun Iraunkorraren aldeko Hiritar Itunean sartuko dira.
Mugikortasun Planari buruzko informazio gehiago: