Leheneratze paisajistikoa Ihurreko ekaitz uren biltegiaren inguruan

CEAk Udalaren Espazio Publikoaren eta Natur Ingurunearen Zerbitzuari lagundu dio biltegiaren ingurunea leheneratzen. Biltegia 2011n eraiki zen Ihurrerako bidearen alboan, ekaitzetan metatzen den eta hiriaren arazketa sisteman arazoak eragiten dituen ura biltzeko.

Biltegia eraiki zenean lur mugimenduak egin ziren gune osoan, eta horretarako bertako landaredia kendu zen. Horrez gain, bi eraikin eraiki ziren biltegiaren alboan, hari zerbitzua emateko.

Leheneratzearen helburua biltegiaren ingurunea hobetzea eta bertako bioaniztasuna handitzeko bidea jartzea izan da. Horretarako, Eraztun Berdearen beste toki batzuetan aplikatutako irizpideak jarraitu dira. Funtsean, zona osoa landarez hornitu da eta bi eraikinen ikusizko inpaktua minimizatu da.

Bestalde, zona horretan Eraztun Berdeko bideen sareak izan dituen etenak konpondu dira.

Argazkia: Biltegiaren ikuspegia, Ibaiondo auzoaren iparraldean, leheneratze lanak egin aurretik.