Fernando Moleres argazkilariaren 'Melting Landscapes' erakusketa inauguratu da Atarian
Fernando Moleres argazkilari eta dokumentu-bideogileak “Melting Landscapes” — Paisaiak urtze bidean– proiektua erakutsiko du Atarian; Klima-aldaketaren inguruan hausnartzeko oinarriak bildu ditu 34 argazkiz osatutako erakusketan. Helburua da klima-aldaketaren arazoari eta horrek planetako bi alderdi sentikorrenetan –– dituen ondorioei buruz kontzientziatzeko eta sentsibilizatzeko ekintzak garatzen laguntzea.
Planetak bizi duen larrialdi klimatikoaren ondorioak nabariak dira duela urte batzuetatik, eta, horregatik, funtsezkoa da gobernuek, erakundeek eta herritarrek kontzientzia hartzea.
Argazkiek izotz-paisaien desagerpen isila islatzen dute. Prozesu hori geldiarazteak mentalitate-aldaketa sakona eta energia ekoiztu, kontsumitu eta banatzeko moduak errotik eraldatzea eskatzen du. Industria-iraultza aurreko tenperatura baino bi gradu zentigrado gehiago: horixe da komunitate zientifikoaren kide gehienen aburuz, Lur planeta itzuli ezineko egoeratik bereizten duen tartea… eta dagoeneko 1,1 gradu igo da tenperatura globala.
Fernando Moleresek –Bilbon jaioa (1963) baina egoitza Bartzelonan – urteak daramatza lurraren mugetan lanean, lurreko tenperatura igotzeak dakarren arazo handiena jendeari ezagutarazteko. 2014an bere ibilbideari ekin zionetik, egunkari askotan argitaratu dira Artikoari eta Antartikoari buruz egin dituen lanak.
