Gasteizek Biosfera Erreserbaren proposamenaren diseinua izango du urtebetean
Erreserbaren kodiseinu, kontraste eta proposamena egiteko laguntza teknikoa kontratatu berri da. Ekintza horretara 100.000 euro bideratuko dira guztira (BEZa barne), Udal Gobernuaren eta EH Bilduren arteko 2026rako aurrekontu-akordioari esker.
12 hilabeteko epean, 2026ko irailaren 9an hasita, enpresa esleipendunak Biosfera Erreserbaren proposamenaren azken dokumentua garatu beharko du. Horretarako, talde eragilea izango dute, proposamenaren diseinua eta ereduaren definizioa egingo dituena, eta proposamenaren eragile eta publiko objektiboekin kontrastatuko da. Proposamenaren azken dokumentuak honako hauek jaso beharko ditu: proposamenaren eremuaren mugaketa eta ezaugarri fisikoak eta lurralde mailakoak, kontserbazioko, garapeneko eta laguntza logistikoko funtzioei ekiteko erronkak, helburuak eta jarduketak, proposamena garatzeko gobernantza-proposamena eta prozesuarekin jarraitzeko ibilbide-orria.
Ingurumen-balio handiko eremua
Arabako lehen Biosfera Erreserba Zadorraren goiko arroan planteatu da, 950 km2 inguruko azalerarekin, eta 14 udalerri eta 275.000 biztanle bilduko ditu. Aurrera eramango balitz, Estatu osoan biztanle gehien dituen Biosferaren Erreserba bihurtuko litzateke.
Ingurumen-balio handiko eremua da, honako hauek barne hartzen dituela: Gasteizko Mendiak, Arrato mendilerroa eta Gorbeiako Parke Naturala, Aizkorri-Aratz Parke Naturala eta Urkiolako mendilerroa, Entzia mendilerroa eta Iturrietako mendiak. Erreserbaren barruan dauden leku natural interesgarrien artean, Gasteizko Eraztun Berdea, Salburuko hezeguneak eta Zadorrako eta bertako urtegietako kontserbazio bereziko eremuak nabarmendu behar dira.