Bizikleta maileguko zerbitzuaren balantzea

2008an bizikleta maileguko zerbitzua martxoaren 4an jarri zen abian eta abenduaren 30a arte egon da indarrean. Mailegua 13 puntutan eskaini da: Aldabe, Arriaga, Pilar, Iparralde, Hegoalde, Judimendi eta Lakua gizarte etxeak, Ariznabarreko kiroldegia, Mendizorrotzeko frontoiak, El Boulevard eta Lakua Center merkataritza guneak eta Turismoko Udal Bulegoa. Puntu bakoitzean 15-25 bizikleta egon dira eskuragarri, leku bakoitzean ikusitako eskariaren funtzioan.

2008an ere arrakasta erdietsi da erabiltzaile kopuruari dagokionez. Mailegu sasoia amaitzean, 45.907 lagun zeuden izena emanda, alegia, izen emateak gero eta gehiago dira. Mailegu kopurua 110.155ekoa izan da. Kopuru hau oso handia da kontuan hartzen bada eguraldiak ez duela lagundu udazkenean eta neguan. Eguneko 380 mailegu egin dira, 2007an baino 20 gehiago.

Mailegu kopururik handiena Aldabe gizarte etxean izan da, eta ondoren Pilar gizarte etxean, Turismoko Udal Bulegoan eta Iparralde gizarte etxean. Eskari handiena, berriro ere, maiatzean, ekainean eta uztailean izan da. Abenduan ere kopuru polita erdietsi da, 5.000 erabilera baino gehiago egon baita.