Atarian 'Askara' askatu dute, Done Bikendi elizan jaio eta Martiodan suspertu den zikoina zuria

Salburuko hezeguneen interpretazio zentroan, Atarian, gaur goizean zikoina zuri gazte bat askatu dute, aurten Done Bikendi elizan jaio eta Martioda zentroan suspertu dena, Gasteizko erdialdeko barruko patio batean agertu ondoren.

Suspertutako zikoinari Aranzadiren Eraztuntze Bulegoaren metalezko eraztun ofiziala eta PVCzko beste bat jarri zaizkio, bere jarraipena eta azterketa egiteko. Halaber, neurri biometrikoak hartu zaizkio eta, azkenik, hegaz joan da Green Summer Camp udalekuetako umeen aurrean.

Zehazki, zikoina zuria ohiko espeziea da Arabako Foru Aldundiaren mende dagoen Martioda Faunaren Suspertegian. Izan ere, 2015ean hamabost zikoina pasa ziren bertatik, gehienak habiatik erori eta gero. Aurten ere, 5 ale sartu dira zentroan eta 'Askara' izan da suspertu den lehena.

Zortzi basahate ere askatu dira, horiek ere zentroan bertan suspertutakoak. Guztira, 25 urteko ibilbidean zehar, 10.984 animalia pasa dira Martioda Faunaren Suspertegitik.