CEAk 56 jarduera aurkeztu ditu 2026ko negurako
CEAk 2026ko negurako jardueren agenda aurkeztu du, urtarriletik martxora bai Salburuan (Ataria), bai Olarizuko Lorategi Botanikoan, egingo diren 56 proposamenekin.
Atariaren erakusketa-programazioak hasiera emango dio denboraldiari, María José Lojo Escalanteren ‘Oihartzunean bizi direnak’ erakusketa ikusgai egongo den azken egunekin. Barruko paisaiekin eta mundu naturalarekin lotutako figura femeninoek osatutako unibertso artistikoa urtarrilaren 11ra arte egongo da ikusgai.
Martin Barandallaren ‘Arabako erreginak’ lanak hartuko du jarraian haren lekukoa, eta Araban bizi den arrano beltz bikote baten inguruan egindako lana erakutsiko du. Jarraian, martxotik aurrera, Patricia Nagashiroren ‘Fenologia’ k artearen eta zientziaren arteko fusioa arakatzera gonbidatuko ditu bisitariak, urtaroen zikloei eta klima-aldaketaren ondorioei buruzko eszena onirikoen bidez.
Atariaren hitzaldi-zikloak askotariko gaiak jorratuko ditu: nutrizioa eta elikadura-oreka, neguko tradizioak, astronomia edo arrisku astronomikoak. Eguzki-eklipseez hitz egingo da (2026korako prestatzeko), udaberriko zeruaz, maskarada tradizionalez eta hurbileko supernoba bat Lurreko bizitzarako arriskutsua izan litekeen ala ez. Gainera, Zerynthia Elkartearekin lankidetzan, Mariposa del Año 2026 aurkeztuko da.
Tailerrek hainbat diziplinatan ikasteko eta esperimentatzeko espazioak eskainiko dituzte, hala nola ilustrazio zientifikoa, ibaiertzeko fauna eta kastore europarraren inpaktua, arropen birziklapena, lumen behaketa, fauna-arrastoak interpretatzea edo landa-koadernoa. ‘Naturaleza en Alta Voz’ topaketako lantegiek hileroko saioekin jarraituko dute, eta hiruhileko honetan Vicente Aleixandre eta Gloria Fuertesen testuak landuko dituzte.
Natura-irteerek neguan natura era askotara ezagutzeko aukera emango dute: hegazti negutarrak, Salburuko historia, lepidopteroak hotz egiten duen garaian, hegazti-komunitateak, Gasteizko mendietako biodibertsitatea edo ibilbideak hezegunean zehar bizikletaz.
Familia-jarduerek protagonismo nabarmena izango dute, esploraziora eta ikaskuntza partekatura bideratutako proposamenekin. Hiruhileko honetan parte-hartzaileek superbotere natural batzuk ezagutuko dituzte: zehazki, ekolokalizazioari esker saguzarrak nola orientatzen diren ikasiko dute. Hegaztientzako janlekuak eraikitzen ikasteko bi aukera egongo dira, dinamika artistikoekin egindako ipuin-kontaketak, familian yoga saioak egiteko aukera, eta urari eta itsasoari lotutako jolas sortzaileko jarduerak egingo dira besteak beste.
Olarizuko Lorategi Botanikoa
Olarizuko Lorategi Botanikoaren inguruan ibilbide naturalistikoak egingo dira, neguaren amaierako erritualetan eta eguzkiaren esnatzean murgilduz. Gainera, hegazti negutarren bilaketa ere egingo da, hegazti horietako askok Lorategi Botanikoa erabiltzen baitute negua bertan emateko edo atseden hartzeko.
Larunbat eta igandero, doako bisita gidatua eskainiko da. Artadi, artelatz-basoetan, izeien basoetan, sabinarren basoetan eta pinudietan zehar izango da. Ibilbideak Europako banaketa eta Mediterraneoko klimara egokitutako landare iraunkor horien estrategiak ezagutzeko aukera emango du.
Natur Zientzien Museoko VIT herbarioaren kontserbatzaileek XVIII. mende amaierako Lorenzo Prestamero Herbario Historikoa hurbilduko dute herritarrengana. Arabako flora biltzen duten mila plegu baino gehiago dira, eta pertsona gutxiren eskura dagoen esperientzia izango da.
Denentzako lantegiak ere izango dira, eta era askotako gaiak landuko dituzte. Horietako bat izango da boilurrena, eta boilurrak bilatzeko simulazioa ere egingo da. Bestalde, hennak eta landareetatik datozen pigmentu naturalak, landareak eta material birziklatua erabiliz sokak nola fabrikatu, zume motak, eta formak eta teknikak, eta etxean egindako argazki-kamera txikiak fabrikatzen ikasi ahal izango dute bertaratzen direnek, gero eguzkiaren ibilbidea behatzeko.
Familientzako Olarizuko programazioak ginkana bat ere izango du baso borealen sekretua bilatzeko, eta zuhaitzaren egunean baso bat sortzen erakutsiko dute artilea, kartoia, pinturak, azalak, adarrak, fruituen oskolak eta askoz material gehiago erabiliz.
Gainera, hileko lehen ostiraletan, Euskadiko Hazien Sareak Olarizuko Etxaldearen ateak irekiko ditu, martxan dituzten laneko espazioak eta proiektuak ezagutzeko.
Agenda osoa dago ikusgai Udalaren webgunean.
Izena emateko epea irekita dago jadanik. Atarian, gizarte etxeetan, 010 telefonoan eta udal webgunean eman daiteke izena.